ياليت______________حزنى

{ يا ليت (حزني) مجرد دمع.. وابكيه!! ...}




الصمت يكفي ويشفي صدر راعيه
لا صار كل الحكي ماله معاني



والقلب ما عاد تعنيه المشاريه
والعين ماعاد تغريها الأماني




والخاطر العمس من يقدر يسليه
الناس وإلا الشعر وإلا الأغاني ..؟



يا كاتب الحزن في قلبي وقاريه
في نظرتي في انفعالي في حناني




ياليت حزني مجرد دمع وابكيه
ماهوب عايش معي بين المحاني



ماهوب يظهر علي وأحاول أخفيه
و تصير نظرات حزني هي لساني



لو للسحايب سجن يا عبرة التيه
والله ما احبسك بخفاقي ثواني



مدري ذكرني زمان كنت ناسيه
مدري ذكرت الزمان اللي نساني



كنت أكره البحر وأخاف الغرق فيه
و اليوم أحبه واخاف من المواني



كنت أعشق الجاي بأحلامه وأمانيه
يا ما بنيت بخيالي له مباني



ياما رجيت العطا من مدة يديه
حتى خذا كل شي وما عطاني

سحابه شوق


بقلم شاعر وريشة فنان